ཆེས་མཐོའི་ཁྲིམས་ཞིབ་ཁང་གསར་འཛུགས་དང་། འཕེལ་རིམ།
༡། བཙན་བྱོལ་བོད་མིའི་བཅའ་ཁྲིམས་དོན་ཚན་ ༦༢ པའི་ཆ་རྐྱེན་འོག་ཕྱི་ལོ་ ༡༩༩༢ ཟླ་ ༣ ཚེས་ ༡༡ ཉིན་བཙན་བྱོལ་བོད་མིའི་ཁྲིམས་ལུགས་དབང་འཛིན་ གྱི་ཆེས་མཐོའི་ཁྲིམས་ཞིབ་ཁང་འདི་ཉིད་བཞུགས་སྒར་དྷ་རམ་ས་ལར་དབུ་འཛུགས་གནང་ཡོད།
༢། ཆེས་མཐོའི་ཁྲིམས་ཞིབ་ཁང་ཐོག་མར་དབུ་འཛུགས་གནང་སྐབས་ཁྲིམས་ཞིབ་པ་ཆེ་བ་གཅིག་ལས་མེད་པ་དང། ཕྱི་ལོ་ ༡༩༩༧ ཟླ་ ༠༡ ཚེས་ ༢༩ ཉིན་ ཁྲིམས་ཞིབ་པ་གཞན་གཉིས་བསྐོ་གཞག་དམ་འབུལ་མཛད་དེ། ད་ལྟའི་ཁྲིམས་ཞིབ་ཁང་གི་གྲུབ་ཆ་ཚང་བར་བགྱིས་ཡོད།
༣། ཆེས་མཐོའི་ཁྲིམས་ཞིབ་ཁང་གསར་འཛུགས་གནང་བ་ནས་ཕྱི་ལོ་ ༢༠༠༤ བར། ཆེས་མཐོའི་ཁྲིམས་ཞིབ་ཁང་གི་ཁྲིམས་ཞིབ་པ་ཆེ་བ་དང་། ཁྲིམས་ཞིབ་ པ་གཞན་གཉིས་བཅས་གོང་ས་སྐྱབས་མགོན་ཆེན་པོས་འོས་འཛུགས་གནང་བར་སྤྱི་འཐུས་ལྷན་ཚོགས་ཀྱི་སྤྱི་འཐུས་རྩ་འབོར་གསུམ་ཆ་གཉིས་ཡན་ གྱིས་མོས་མཐུན་བྱུང་ན་དེ་ལ་གོང་ས་སྐྱབས་མགོན་ཆེན་པོས་རྒྱལ་ཁབ་ཀྱི་དབུ་འཛིན་གྱི་མཚན་ཐོག་ནས་བསྐོ་གཞག་མཛད་ཡོད།
༤། ༢༠༠༤ ལོའི་བཅའ་ཁྲིམས་བསྐྱར་བཅོས་༡༥ པར། ཆེས་མཐོའི་ཁྲིམས་ཞིབ་ཁང་གི་ཁྲིམས་ཞིབ་པ་ཆེ་བ་དང༌། ཁྲིམས་ཞིབ་པ་གཞན་གཉིས་བཅས་སོ་སོ་ ནི་ཆེས་མཐོའི་ཁྲིམས་ཞིབ་པ་ཆེ་བ་དང༌། སྤྱི་འཐུས་ཚོགས་གཙོ་ཚོགས་གཞོན། བཀའ་བློན་ཁྲི་པ་བཅས་ནས་བསྐོ་འཛུགས་བྱས་པའི་མི་འགྲོ་གསུམ་ མམ་ལྔ་ཡོད་པའི་འདེམས་སྒྲུག་ཚོགས་ཆུང་གིས་ཉིས་ལྡབ་ལས་མ་ཉུང་བའི་འཆར་ཕུལ་ལྟར་༸གོང་ས་སྐྱབས་མགོན་ཆེན་པོས་འོས་འཛུགས་གནང་ བར་སྤྱི་འཐུས་ལྷན་ཚོགས་ཀྱི་སྤྱི་འཐུས་རྩ་འབོར་གསུམ་ཆ་གཉིས་ཡན་གྱིས་མོས་མཐུན་བྱུང་ན་དེ་ལ་༸གོང་ས་སྐྱབས་མགོན་ཆེན་པོས་རྒྱལ་ཁབ་ཀྱི་ དབུ་འཛིན་གྱི་མཚན་ཐོག་ནས་བསྐོ་གཞག་མཛད་ལམ་བཟོས།
༥། ༢༠༠༦ ལོར་༸གོང་ས་སྐྱབས་མགོན་ཆེན་པོ་མཆོག་གིས་བཀའ་རྩ་ཁྱབ་བསྒྲགས་གནང་བ་ལྟར། བཅའ་ཁྲིམས་བསྐྱར་བཅོས་ ༢༠ པར་གོང་ས་སྐྱབས་ མགོན་ཆེན་པོ་མཆོག་མཛད་ཁོམ་མ་གྱུར་པའི་སྐབས། སྤྱི་འཐུས་ཚོགས་གཙོ་ཚོགས་གཞོན་ནས་ཁྲིམས་ཞིབ་པ་ཆེ་བའམ་ཁྲིམས་ཞིབ་པ་གཞན་གང་ རུང་གི་མདུན་དུ་ལས་འཁུར་དམ་འབུལ་ལེན་ཆོག་པའི་གཏན་འབེབས་མཛད།)
༦། ༢༠༡༡ ལོའི་བཅའ་ཁྲིམས་བསྐྱར་བཅོས་ ༢༥ པར། ཆེས་མཐོའི་ཁྲིམས་ཞིབ་ཁང་གི་ཁྲིམས་ཞིབ་པ་ཆེ་བ་དང༌། ཁྲིམས་ཞིབ་པ་གཞན་གཉིས་བཅས་སོ་སོའི་ གོ་ཡུལ་སྟོང་པ་ནམ་ཐོན་ལ་ཆེས་མཐོའི་ཁྲིམས་ཞིབ་པ་ཆེ་བ་དང༌། སྤྱི་འཐུས་ཚོགས་གཙོ་ཚོགས་གཞོན། བཀའ་བློན་ཁྲི་པ་(སྐབས་ ༡༥ པའི་གྲོས་ཚོགས་ ཚོགས་དུས་ ༤ པར་སྲིད་སྐྱོང་ཞེས་བསྐྱར་བཅོས་གཏན་འབེབས་གནང་།) བཅས་ནས་ (སྐབས་ ༡༦ པའི་གྲོས་ཚོགས་ཚོགས་དུས་ ༡༠ པའི་ཐོག་སྲིད་ སྐྱོང་བཅས་ཚང་འཛོམས་བྱུང་ན་སྨོས་མེད་དང་། གལ་ཏེ་ཚང་འཛོམས་མ་ཐུབ་ཚེ་ངོ་ཡོད་ལྷན་ཚོགས་ཀྱིས་ཅེས་བསྐྱར་བཅོས་གཏན་འབེབས་ གནང་།) སྐབས་དེའི་འོས་མི་འདེམས་སྒྲུག་ཁོ་ནའི་ཆེད་བསྐོ་འཛུགས་བྱས་པའི་མི་འགྲོ་གསུམ་མམ་ལྔ་ཡོད་པའི་འདེམས་སྒྲུག་ཚོགས་ཆུང་གིས་ཉིས་ ལྡབ་ལས་མ་ཉུང་བའི་འཆར་ཕུལ་ལྟར་སྤྱི་འཐུས་ལྷན་ཚོགས་སུ་འོས་བསྡུའི་ལམ་ནས་མང་མོས་ཐོབ་པ་དེར་ཁྲིམས་ཞིབ་པ་ཆེ་བའམ་ཁྲིམས་ཞིབ་པར་ འོས་ཐོན་བྱུང་བར་ངོས་འཛིན་བྱ་རྒྱུ་ཞེས་བསྐྱར་བཅོས་གཏན་འབེབས་གནང་།
༧། ཕྱི་ལོ་ ༢༠༡༡ ལོའི་བཅའ་ཁྲིམས་བསྐྱར་བཅོས་ ༢༥ པ་གཏན་འབེབས་མ་གནང་གོང་། ཆེས་མཐོའི་ཁྲིམས་ཞིབ་ཁང་གི་ཁྲིམས་ཞིབ་པ་ཆེ་བ་དང་ཁྲིམས་ ཞིབ་པ་གཞན་གཉིས་བཅས་སུ་བསྐོ་གཞག་མཛད་པའི་སྐྱེ་བོ་དེ་དག་གིས་ལས་འཁུར་དུ་མ་ཞུགས་གོང་༸གོང་ས་སྐྱབས་མགོན་ཆེན་པོ་མཆོག་གི་སྐུ་ མདུན་དུ་ཁྲིམས་ལུགས་གཏན་འབེབས་བྱས་པའི་ཚིག་གཞི་ལྟར་ལས་འཁུར་དམ་བཅའ་འབུལ་བཞེས་མཛད་སྲོལ་ཡོད་ཀྱང་།
༨། བཅའ་ཁྲིམས་བསྐྱར་བཅོས་ ༢༥ པ་གཏན་འབེབས་གནང་རྗེས། ཆེས་མཐོའི་ཁྲིམས་ཞིབ་ཁང་གི་ཁྲིམས་ཞིབ་པ་ཆེ་བར་འོས་ཐོན་བྱུང་འཕྲལ་ལས་ འཁུར་དུ་མ་ཞུགས་གོང་འཁྱུར་ཉེའི་ཁྲིམས་ཞིབ་པ་ཆེ་བའམ་ལས་ཚབ་ཀྱི་མདུན་དུ་(སྐབས་ ༡༧ པའི་གྲོས་ཚོགས་ཚོགས་དུས་ ༧ པ་ཐོག་ཁྲིམས་ཞིབ་ པ་ཆེ་བའི་མདུན་ནམ། ཁྲིམས་ཞིབ་པ་ཆེ་བ་མེད་ཚེ་སྤྱི་འཐུས་ཚོགས་གཙོའི་མདུན་ཁྲིམས་ལུགས་སུ་ཞེས་བསྐྱར་བཅོས་གནང་།) གཏན་འབེབས་བྱས་ པའི་ཚིག་གཞི་ལྟར་ལས་འཁུར་དམ་བཅའམ་ཁས་ལེན་ཞུ་དགོས། ཁྲིམས་ཞིབ་པ་གཞན་གཉིས་འོས་ཐོན་བྱུང་འཕྲལ་ཁྲིམས་ཞིབ་པ་ཆེ་བའི་མདུན་ (ཁྲིམས་ཞིབ་པ་ཆེ་བའི་མདུན་ནམ། ཁྲིམས་ཞིབ་པ་ཆེ་བ་མེད་ཚེ་སྤྱི་འཐུས་ཚོགས་གཙོའི་མདུན་ཁྲིམས་ལུགས་སུ་) གཏན་འབེབས་བྱས་པའི་ཚིག་གཞི་ ལྟར་ལས་འཁུར་དམ་བཅའམ། ཁས་ལེན་བྱེད་དགོས་པ་ཡིན་པ་མ་ཟད། སྤྱི་འཐུས་ཚོགས་གཙོ་ཚོགས་གཞོན་དང་། སྲིད་སྐྱོང་དང་བཀའ་བློན་རྣམ་ པ། རང་དབང་ཅན་གྱི་སྡེ་ཚན་གསུམ་གའི་འགན་འཛིན་དང་ཚོགས་གཙོ། འགན་འཛིན་ལས་འཕར་དང་ཚོགས་མི་བཅས་པས་ཀྱང་ཁྲིམས་ཞིབ་པ་ཆེ་ བའམ་ལས་ཚབ་ཀྱི་མདུན་དུ་(སྐབས་ ༡༧ པའི་གྲོས་ཚོགས་ཚོགས་དུས་ ༧ པ་ཐོག་ཁྲིམས་ཞིབ་པ་ཆེ་བའི་མདུན་ནམ། ཁྲིམས་ཞིབ་པ་ཆེ་བ་མེད་ཚེ་སྤྱི་ འཐུས་ཚོགས་གཙོའི་མདུན་ཞེས་བསྐྱར་བཅོས་གཏན་འབེབས་གནང་།)དམ་བཅའམ། ཁས་ལེན་བྱེད་དགོས་པ་ཡིན།
ངོ་སྤྲོད།
ཁྲིམས་ཡིག་ཁག
ཁྲིམས་ཁོངས་ཁྱབ་ཚད།
རྒྱལ་ཁབ་གཞན་གྱི་རྩ་ཁྲིམས།