སྐོར་སྐྱོད་ཁྲིམས་ཞིབ་ཁང་ལའང་ཡོད་པའི་ཐོག་མའི་གཏུག་བཤེར་གྱི་ཁྲིམས་ཁོངས་ཁྱབ་ཚད།

ཀ།  ༡། བཙན་བྱོལ་བོད་མིའི་བཅའ་ཁྲིམས་དང༌་། ཁྲིམས་ལུགས། ཆབ་སྲིད་དབང་འཛིན་གྱི་བཀའ། སྒྲིག་གཞི་བཅས་གང་རུང་གི་ཚིག་དོན་འགྲེལ་བརྗོད་བྱེད་ཕྱོགས་དང་འབྲེལ་བའི་རྩོད་གླེང༌དང་། བོད་མིའི་སྒྲིག་འཛུགས་ཀྱི་འཛིན་སྐྱོང་ལས་ཁུངས་ཁག་དང་། ཁྱབ་ཁོངས་སྡེ་ཚན་ཁག་གི་སྒྲིག་གཞི་དང་། རྩ་འཛིན། ལམ་སྟོན། བཀའ་ཁྱབ། བཀོད་ཁྱབ་བཅས་གང་རུང་ཞིག་སྤྱི་འཐུས་ལྷན་ཚོགས་ཀྱིས་གཏན་འབེབས་བྱས་པའི་ཁྲིམས་ཡིག་དང་སྒྲིག་གཞི་གང་ཞིག་དང་མཐུན་མིན་གྱི་རྩོད་གླེང་།

༢།  བཙན་བྱོལ་བོད་མིའི་བཅའ་ཁྲིམས་དགོངས་དོན་བོད་ཀྱི་ཡུལ་མིའི་གཞི་རྩའི་ཐོབ་ཐང་དང༌ལས་འགན། དེ་བཞིན་ཁྲིམས་ཀྱི་ཐོབ་ཐང་བཅས་ལ་གནོད་འགལ་དང་འབྲེལ་བའི་རྩོད་གླེང་༌།

༣།  བོད་མིའི་སྒྲིག་འཛུགས་མ་ལག་གི་ལས་བྱེད་པ་ཁག་གི་ཁེ་ཕན་རྗེས་འབྲེལ་གྱི་རྩོད་གླེང་༌།

༤།  བོད་མིའི་སྒྲིག་འཛུགས་མ་ལག་གང་རུང་དང་༌། དེ་དག་གི་ལས་བྱེད་པ་ཆེ་ཕྲའི་གཞུང་འབྲེལ་ལས་དོན་བྱེད་ཕྱོགས་དང་འབྲེལ་བའི་རྩོད་གླེང་༌།

ཁ།  དོན་ཚན་འདིའི་ནང་གསེས་ ཀ།  ནང་གསལ་གྱི་རྩོད་གླེང་རྣམས་དགོས་གལ་ཆེ་བའི་དམིགས་བསལ་རྒྱུ་མཚན་ཡོད་ན་མ་གཏོགས་ཐོག་མའི་གཏུག་བཤེར་ས་གནས་ཁྲིམས་ཞིབ་ཁང་དུ་བྱ་རྒྱུ་གཙོ་འདོན་བྱེད་དགོས་པ་དང་༌། དགོས་གལ་ཆེ་བའི་དམིགས་བསལ་རྒྱུ་མཚན་ཡོད་མེད་འབྲེལ་ཡོད་སྐོར་སྐྱོད་ཁྲིམས་ཞིབ་ཁང་དེས་ཐག་གཅོད་བྱེད་ཆོག